相集 越野雄心-- 靈象脊-象額 行程
靈象脊,其實是馬鞍山以東一條極陡的隱脊,位於大洞脊左則。靈象的由來是因為從企嶺下望向馬鞍山馬頭峰的位置,其形態甚似一隻象,而靈象脊就是象鼻的位置,象鼻以上又有一丘是為象額,象額之地均為崖壁險地,但亦非無路可通,尚有彌天棧道及象門等險線歷奇。 30/12/04

放大
。睇睇呢張相,應該可以更加了解馬鞍山既靈象。幾年前就已經想行靈象脊,但此地感覺實在太神秘,今次終可一遊

係田寮沿車路行入大洞,前向就係靈象脊...好直呀

要上靈象脊,係要先入大洞坑,但大洞坑入口起咗間野,仲有個閘,唔想兜路,照入,好彩入面D人都比我地過

呢間唔知係乜,好大個花園,行到園後就己經大洞坑
既入口,坑右係大洞脊,靈象脊就入坑

入澗後左右分源,兩邊都有絲帶,要右行大洞主源

再行約100m又左右分源,都係行右源,離開大洞主源

呢條係一條細支澗,沿澗行去到無路可通,要留意左邊山脊絲帶就見有山路離澗上山

呢條就係通上靈象脊既唯一山路,所以唔可以miss,因為極密林,上行一段可以望見靈象脊啦

四周圍都係樹林,好難望見外面景物

山脊真係非常陡直,開始一路都要靠樹上行

呢條山路有D似石芽北脊,好斜但都好闊落,沿路又有樹可以扶住上,所以都唔係好覺險

偶然都要上D石壁斜位

終於可以係石台上面欣賞一下外面既好景啦

呢個石台則,已經係好高既崖邊

越上條脊越直,要攀石脊上行

石脊外有個懸空石台,好精彩,好危險

繼續沿石脊上攀,可以話危而不險

因為石脊都係係樹叢之內

到咗石脊頂,就係靈象脊最險之地-赤淵

赤淵直崖高企,下臨無底,兩壁相對成峽,好有氣勢,而下面就係靈象石澗,黎到呢度就要欣賞一下風景

過赤淵,又入林,經過赤淵崖峽頂,繼續沿石上登靈象脊

過赤淵,進入靈象最陡一段,要倚石而上

石坡樹林相伴,直而不險,但都要攀攀爬爬

不斷向上爬,終有一個位可以外望,下面頂位就係赤淵

上到500m左右,就係一條橫移既險徑-彌天棧道

過彌天棧道再上,好快就離開樹林,陡脊亦放緩

黎到草坡,直上就接返大洞脊山路上馬鞍,如果向左橫移,就會去到象額脊、象額,仲可以見到天涯險位

草脊雖然冇咁陡,但都唔易行

攀險者可以走去探象額,天涯險位

企係天涯險位,可以望見象額脊既直壁危崖

由象額脊下望天崖險位,下臨一片神秘谷地

天涯險位上攀象額,沿崖壁一步一步小心上攀

如果係草坡直上,就會去到馬鞍,牛面就係牛押山

上到馬頭峰頂,氣溫12度,好舒服,大休食野

有時間,決定下降象額象門險線離開


回首頁



回主頁
1