【登高望遠】芒草再現大東山 快啲去影喇喂
http://s.nextmedia.com/realtime/ ... 6647&a=54335666

【鳩嗚乜乜乜】
雖然今年遲遲都未轉涼，不過好多朋友一於少理，近排已經頻頻出動去行山，fb亦都畀行山相洗板，最近連芒草都現真身啦。

喺入秋之後，大嶼山大東山「爛頭營」附近成個山頭，都會慢慢生滿大片嘅芒草，白色嘅絨毛順住風向上下搖擺，喺陽光映照之下仲會染成金黃色。呢個漫山遍野黃金海洋嘅壯觀畫面，每年都吸引唔少香港人上山朝聖，當然仲有好多龍友同Model會專登上山取景。

要上大東山主要有兩條路，一係就喺梅窩嗰面沿山路上，一係就由東涌伯公坳行一條超過一千級樓梯嘅天梯上山。第一條就易行啲，不過交通就冇咁方便；第二條就方便就腳啲，由東涌站轉乘11號巴士就到鳳凰徑起點，但係嗰條天梯就真係少啲腳骨力都行唔到。

費清就問過啱啱上完山嘅朋友，佢哋話而家雖然已經見到有芒草，但唔少地方都比較疏落，仍然未到高峰期，可能再遲吓上山睇會好啲。據以往經驗，一般要到11月中至12月至係睇芒草最佳時間。

  旺角咁多人